Элӗк районӗнчи Мӑн Вылӑ ялӗнче пурӑнакан 81 ҫулти арҫын чӗри тӗлӗнчен ыратма тытӑнсан, сывлама йывӑрлансан арӑмӗ патне шӑнкӑравланӑ. Лешӗ вара васкавлӑ медпулӑшу чӗннӗ.
Тухтӑрсен яла ҫитнӗ те чирлӗ ҫын патне машинӑпа ҫитме май ҫуккине ӑнланнӑ. Дмитрий Ермаков тата Людмила Петрова фельдшерсем хӑйсен хатӗр-хӗтӗрне тата ванна илнӗ те ялти тепӗр икӗ ҫынпа уй урлӑ 2 ҫухрӑм ҫуран кайнӑ.
Юрать-ха, тухтӑрсем вӑхӑтра ҫитнӗ. Вӗсем кайран ватӑ арҫынна ваннӑпа васкавлӑ медпулӑшу машини патне сӗтӗрнӗ.
Кӑҫал республикӑра 40 шыв башнине юсама палӑртнӑ. Ку тӗллевпе хыснаран 100 миллион тенкӗ уйӑрӗҫ.
ЧР Строительство министерстви конкурспа 40 яла палӑртнӑ. Вӗсенче шыв башнисене улӑштарӗҫ. Уйӑрнӑ субсидие 5 района пайласа парӗҫ: Элӗк, Куславкка, Красноармейски, Муркаш тата Ҫӗрпӳ районӗсене.
Россельхознадзор Элӗк районӗнчи усламҫа агрохимикатсене упрамалли йӗркене пӑснӑшӑн административлӑ майпа явап тытнӑ.
Ведомство палӑртнӑ тӑрӑх, Узянов В.Н. усламҫӑ 8 тонна аммиак селитрине ятарлӑ пӳлӗмре упраман, вӑл уҫӑ вырӑнтах, тулта, выртнӑ. Ку вара йӗркене пӑсни шутланать. Россельхознадзор ӗҫченӗсем усламҫӑ тӗлӗшпе протокол ҫырнӑ. Ӑна асӑрхаттару панӑ.
Герасим Харлампьев (Пилеш) писатель-драматург, скульптор, ӳнерҫӗ-график, СССР Писательсен союзӗн членӗ, Чӑваш Республикин культурӑн тава тивӗҫлӗ ӗҫченӗ ҫуралнӑранпа нарӑс уйӑхӗн 25-мӗшӗнче 110 ҫул ҫитет. Ҫавна май нумаях пулмасть Улатӑр районӗнчи Кивӗ Эйпеҫри вӑтам шкулти 6-мӗш класс ачисем валли литература сехечӗ ирттернӗ.
Чӑваш чӗлхипе литературине вӗрентекен Валентина Малышева ачасене ҫыравҫӑ кун-ҫулӗпе тата пултарулӑхӗпе паллаштарнӑ. «Герасим Харлампьев 1913 ҫулта Элӗк районӗнчи Мӑн Тукташ ялӗнче ҫуралнӑ. 1926 ҫулта пуҫламӑш шкултан вӗренсе тухсан вӑл Хутарти ултӑ ҫул вӗренмелли шкула кайса кӗнӗ. Килтен пулӑшакан пулман пирки унтан вӗренсе тухмасӑрах Нурӑсри профшкула кайса кӗнӗ, икӗ ҫул хушши столяр ӗҫне вӗреннӗ. Ун хыҫҫӑн Красноармейски районӗнчи Упири ултӑ ҫул вӗренмелли шкулта ӗҫ учителӗ пулнӑ. Малалла вӗренес ӗмӗтпе Горький хулине тухса кайнӑ. Техникумран вӗренсе тухнӑ хыҫҫӑн 1934 ҫулта пӗр хушӑ Загорск хулинче теттесем тӑвакан заводра ӗҫленӗ, унтан Чӑваш кӗнеке издательствинче илемлӗ ӳкерчӗксен редакторӗнче вӑй хунӑ. Вӑрҫӑ хыҫҫӑнхи ҫулсенче писатель чылай вӑхӑт хушши Чӑваш кӗнеке издательствинче, «Ҫамрӑк коммунист» хаҫат редакцийӗнче ӗҫленӗ, Чӑваш АССР художникӗсен Союзӗн правлени председателӗ, Чӑвашсен художество галерейин директорӗ пулса та ӗҫленӗ», — каласа кӑтартнӑ вӗрентекен.
Нарӑс уйӑхӗн 8-мӗшӗнче К.В. Иванов ячӗллӗ литература музейне чӑваш халӑх поэчӗ Александр Галкин (1928–2002) ҫуралнӑранпа 95 ҫул ҫитнине халалласа пуҫтарӑннӑ.
Пулас поэт Элӗк районӗнчи Чулкаҫ ялӗнче 1928 ҫулхи нарӑс уйӑхӗн 12-мӗшӗнче ҫуралнӑ. Литературӑпа ӗҫлеме вӑл иртнӗ ӗмӗрӗн 40-мӗш ҫулӗсенче пуҫӑннӑ. Унӑн «Ир-ирех тӑрса эп антӑм шыв хӗрне...» пӗрремӗш сӑввине 1956 ҫулта «Ялав» журналта пичетленӗ. Тепӗр виҫӗ ҫултан унӑн «Пӗчӗк ӗҫченсем» кӗнеки кун ҫути курнӑ.
Александр Галкин сӑвӑсем те ҫырнӑ, проза та, юптарусем те. Нумай писатель хайлавне чӑвашла куҫарнӑ.
Хӑй вара чылай ҫул Чӑваш кӗнеке издательствинче ӗҫленӗ.
Астӑвӑм каҫне пуҫтарӑннисем поэтӑн «Кӑвак чечексем» сӑввипе Юрий Кудаков ҫырнӑ юрра пӗрле шӑрантарнипе вӗҫленӗ. Пултаруӑх каҫне Юрий Кудаков та хутшӑннӑ.
Элӗк районӗнчи 63 ҫулти арҫынна суд ҫирӗп режимлӑ колоние 13 ҫул ҫурӑлӑха ӑсатма йышӑннӑ. Вӑл ача тӗлӗшпе ясар ӗҫне пурнӑҫланине суд ҫирӗплетнӗ.
Следстви тата суд палӑртнӑ тӑрӑх, пӗлтӗр ҫӗртме уйӑхӗнче Элӗк районӗнчи пӗр ялта ҫак арҫын 6 ҫулти хӗрачана хӑйӗн кил хуҫалӑхне икӗ хутчен илӗртсе кӗнӗ. Унтан вӑл ясар ӗҫне пурнӑҫланӑ.
Арҫын судра хӑйӗн айӑпне йышӑнман. Ҫапах патшалӑх айӑплавҫи ҫӗртме уйӑхӗнче чӑннипех те ҫапла пулнине ӗнентернӗ.
Чӑваш Енри тата тепӗр пуҫлӑх ҫемҫе пукана пушатнӑ. Элӗк муниципалитет округӗн пуҫлӑхӗнче тӑрӑшнӑ Сергей Морозов вырӑнти Депутатсен пухӑвне хӑйне ӗҫрен хӑтарма ыйтса заявлени ҫырса панӑ.
Самай май каласан, ӗнер эпир Ҫӗмӗрлери Валерий Шигашев ӗҫрен кайни пирки хыпарланӑччӗ. Шигашевпа танлаштарсан, Сергей Морозов пуҫлӑх тилхепине 2 уйӑх ҫеҫ тытса пынӑ.
Элӗк муниципалитет округне илсен, пуҫлӑх тивӗҫне вӑхӑтлӑха пурнӑҫлама пуҫлӑхӑн пӗрремӗш ҫумне Лидия Никитинӑна шаннӑ.
Кӑрлач уйӑхӗн 24-мӗшӗнче Элӗк районӗнчи Дубовски поселокӗнче пӗр ҫуртра икӗ ҫын виллине тупнӑ. Следстви комитечӗн Чӑваш Енри следстви органӗсем халӗ следстви умӗнхи тӗрӗслев ирттереҫҫӗ.
Малтанлӑха пӗлтернӗ тӑрӑх, 57-ри арӑмӗпе 64 ҫулти упӑшки сӗрӗмпе наркӑмӑшланнӑ. Кӑмака пӑрахӗ пӑрланса ларнӑ-мӗн.
Ӗҫ-пуҫа уҫӑмлатас тӗллевпе тӗрлӗ экспертиза тӑвӗҫ.
Ҫветке чупмалли эрне пырать. Ку – ӗлӗкхи йӑла. Ялсенче темиҫе ҫул каялла Ҫветке чупасси анлӑ сарӑлнӑччӗ. Халӗ, шел те, ку манӑҫса пырать
Элӗк районӗнчи Тушкассинче пурӑнакансем ав йӑлана манӑҫа кӑларасшӑн мар. Унта культура ҫуртӗнче юмӑҫ пӑхнӑ, Ҫветке юррисене юрланӑ.
Вутланти культура ҫуртӗнче те ҫынсем юмӑҫ пӑхма пухӑннӑ. Пушкӑртстанри чӑвашсене те асӑнса хӑвармалла. Вӗсем «Сурхури ташши» ташласа Ҫветке уявне паллӑ тунӑ. Ҫав ӗлӗкхи ташӑ Пушкӑртстанри пӗр ялта кӑна упранса юлнӑ-мӗн.
Ҫӗрпӳ районӗнче ҫӗнӗ прокурора ҫирӗплетнӗ. Вӑл – юстицин аслӑ канашҫи Евгений Петров.
Евгений Петров – Ҫӗнӗ Шупашкартан, 1977 ҫулта ҫуралнӑ. 2000 ҫулта И.Н.Ульянов ячӗллӗ ЧПУн юридици факультетне пӗтернӗ, икӗ ҫултан Ҫӗнӗ Шупашкар прокурорӗн пулӑшуҫи пулнӑ.
2018 ҫулхи ҫулларанпа вӑл Элӗк районӗн прокуратурине ертсе пынӑ.
+15.3 °C